PASIUNA

Ni adtong Julyo 14,2017 alas 8:00 sa gabii didto mi sa Tagbao-o, Cogon, El Salvador City sa panimalay ni Apostol Inecito Abragan/SEGUNI sa papel ni Apostol San Felipe. Sa wala pami nagsugod nagkanta una me ug Birthday nga kanta, kay niadtong adlawa Birthday man sa among kauban.

Sa among Pagsugod nangutana siya mahitungod sa among lakaw, ug nisaysay siya kanamo sa iyang kaagi, sa iyang pagkabatan-on, ug nisaysay usab siya kung unsa kalisod ang dalan paingon ni ALFA. Ang unos, ug ang kinabuhi sa iyang pagka Apostoles.

IKA SIYAM NGA PANAW DIDTO KANG APOSTOL INECITO ABRAGAN SR./SEGUNI SA PAPEL NI SAN FELIPE.

Ang Kinabuhi Sugod sa Akong Pagkabatan-on

1  Ang akong kinabuhi sa akong pagkabatan-on, mao kini: Ang akong mga ginikanan balhin-balhin sa pagpuyo, maong wala koy insaktong kaalam sa yutan-ong kinabuhi. Wala ko makahuman ug eskwela taman ra intawon ko sa grade-3, Pag-edad nakog dose anyos ni balhin mi'g puyo didto sa Gingoog. Didto nagkinabuhi ming tipon sa mga mananap sa lasang ug ang katugnaw among matagamtaman sa adlaw og gabie. Bisan paman niining tanan amo kining gi-agwanta, ug sa pag-edad nakog 16, nag puyo me sa katipunan sakop sa Talisay, Gingoog. Didto nahimo kong misyonaryo sa usa ka kapunongan. Ani nga grupo nakatuon ko pag kinabuhing-Diosnon, tungod kay nagtoo ko nga kaning grupoha giubanan sa Dios kay diri walay bisyo ang mga miyembro.

2  Apan sa pagligid sa panahon, akong nakita nga dili diay mao kini ang dalan nga akong gipangita. Mao nga gihawa ko ni aning dapita, gibalhin ko sa Kagumahan sakop sa Side 2,Gingoog City. Didto nagkinabuhi ko nga puno sa mga kahilayan uban sa akong mga uyuan. Inom dinhi, inom didto. Bayle dinhi, bayle didto. Hangtud niabot ang panahon nga misulod ang mga rebelde, nakita nako nga ang mga rebelde dili motoo ug Dios kay ang armas maoy ilang giilang Dios. Unya, gusto kong agnihon o danihon sa mga rebelde nga mahimo nilang magwawali. Apan bisan paman sa akong pagkabugoy, mahinadlukon pa gihapon ko sa Ginoo busa gihangyo nako ang akong mga ginikanan nga muuna ko nila pag-uli sa Cagayan de Oro City.

3  Sa pag-abot nako sa Cdo, milahos ko sa El Salvador wala kaayo koy na-ilhan sa akong mga paryente tungod kay bata pa man ko gihawa diring dapita, busa sa akong apuhan ko nag puyo hangtud naila o nahinasa nako ang akong mga paryente. Ug dinhi misamot ang akong bisyo sa pag-inom og sa paglakaw-lakaw bisan asang dapita. Sa pag-edad nakog 20, niuli na ang akong mga ginikanan diri sa El Salvador. Nag puyo dayon me diri sa Himaya, ug dinhi akong nakita ang akong asawa.

4  Sa pagkaminyo nako, dinhi nagsugod ang kasakit sa akong kinabuhi. Pagkatawo sa akong kinamagulangang anak, nag dala ko'g kapunungan diin ako ang presidente. Dinhi mas nisamot pa ang akong pagkinabuhing buluyagon, kay daghan na man ko ug sakop nga badlungon, wala koy simba-simba og wala na pud koy giila nga relihiyon.

Ang Kalisod sa Dalan na Akong Gi-agian Padulong ni ALFA

5  Niabot ang panahon nga giduulan ko sa akong uyuan nga si Apostol Bebito Langala/BIGABU, aron sa pagpahibalo kanako nga maminaw ug wali mahitungod sa pulong sa Ginoo didto sa Himaya. Ug naka desisyon ko nga muadto ug maminaw, human ko nakapaminaw, usa ka trahedya ang niabot sa akong pamilya. Sa nagsakay nako sa baka kauban ang akong anak, nagminaltugo ang baka ug nahulog mi. Dayon nasipaan sa baka ang ulo sa akong anak, dako kaayo ang samad sa iyang ulo ug gidala namo sa Baranggay Health Center. Ingon ang midwife nga dad-on sa doktor aron matahi ang samad sa akung anak pero wala nako dad-a sa doktor, gidala nako sa Balaang Krus diin toa didto ang mga Apostoles. Mao kadto'y unang pagsuway nga miabot sa akong kinabuhi.

Sa sunod nga panahon nag pahibalo ang mga Apostoles nga naay inisasyon. Mao nga naghuna-huna ko nga magpa-inisyal apan usa na usab ka trahedya ang niabot sa akong pamilya imbes magpa-inisyal nako, ang akong bata nga si Lonelyn na ospital siya nga grabe. Bisan pa man niadto naningkamot ko nga ma-inisyalan ug na inisyalan gyud ko. Pagka human nako nadawat ang akung ikaduhang ngalan, paglabay sa mga adlaw namatay ang akong anak .

Taliwala sa akong mga pag sulay natugkad nako ang pagtulun-an sa Ginoo. Mao nga sa iyang pagtulun-an, natisok sa akong kasing-kasing nga "Isangyaw ang maayong balita, may kahigayunan ka man o wala" mao nga nagsangyaw ko bisag asa, ma balay man siya o umahan. Mao ni hinungdan nga gi-initan ko sa mga rebelde, ug gipadal-an ko ug sulat nga ang akong pag-wali kulang ra sa usa ka salmong luha para sa akong pamilya. Sanglit ang akong balay usa raman ka payag, walay sirado, mao nga nahadlok ang akong asawa. Panahon sa among pagkatulog, ako matulog apan ang akong asawa dili matulog kay magbantay ra kanako, mao sa akong kahadlok nga basin magdaot ang akong asawa gi adto ko kang Mons. Camilo C. Diel Sr. ALFA, gi-ignan ko niya nga ipatugbong ko didto sa Baybay.

Ang Dakong Unos sa Dagat

6  Didto na dayon mi nagpuyo sa Baybay sa Taytay, El Salvador ug ni samot ang among kalisod, sa akong pagpaningkamot sa pagpangita sa adlaw-adlaw namong kinahanglanon, nakalimtan na nako ang akong katungdanan sa pagsimba sa Dios. Unya ni abot ang panahon nga gitagaan ko niya ug pagsuway aron sa pagpadumdum kanako sa pagpangalagad, didto sa kalawran miabot ang dakong unos nga maoy nakapahatag kanako ug kalisang nga basin dili nako makabalik sa daplin, igo na lang ko sa paghilak uban ang pag-ampo ug pagpangamuyo ngadto kang ALFA nga kun iya pakong hatagan ug kaluwasan gikan niining dakong unos, mubalik ko sa bukid aron sa pagbalik ug pag-alagad ngadto kaniya, salamat sa Dios gihatagan pako niya ug panahon.

Ang Kinabuhi sa Akong Pagka Apostoles

7  Sa dihang gibalik ko sa bukid, didto niabot na pud ang usa ka dakong pagsuway, ang akong kinamagulangang anak nga si Joan nasapon sa dakong binuang sa tawo ug na pulyo. Apan wala kini makahatag nako ug kahuyang sa pagpangalagad, hinuon nahimo kong reserve sa Apostoles, ug dinhi nakita ni Apostle Epifanio Makatual/PIGUTO ang kahimtang sa akong anak, iya kining giatiman ug tambal hangtod sa iyang pagkaayo. Mao kini ang sinugdanan sa akong pagkinabuhi isip usa ka reserve na Apostoles, dayon nag kinabuhi ko sibo sa kabubut-on sa Ginoo. Mikuyog ko sa pagwali sa pulong sa Ginoo sa bisag asang dapit, ma-adlaw man o gabie, biniyaan ang akong pamilya, sa akong pagwali sa pulong sa Ginoo ang mga pagsulay sa akong kinabuhi nagpabilin hangtud karon.

Ang Usa sa mga Pagsulay sa Akong Pagka Apostoles

8  Diha sa akong pamilya, ang akong anak nga si Inecito Jr. na operahan tungod sa dakong bato sa iyang pantog nga nag resulta sa paglisod niyag ihi ug kalibang, na anemic pud siya pag-ayo tungod sa iyang balatian. Gusto sa doktor nga abunohan siya ug dugo adiser operahan busa nangayo ko'g panabang ni Apostol Epifanio Macatual/PIGUTO sa pag-abuno ug dugo, na abunohan ang akong bata ug dugo pinaagi sa Espirituhanon nga pamaagi. Nag pasalamat ako sa Dios nga si ALFA nga na operahan ug na ulian ang akong bata.

Ang Pagkahimo Nakong Apostol Felipe

9  Nilabay ang mga panahon, namatay si Apostle Ernesto Rajal nga nag dala sa papel ni Apostol Felipe. Mao nga gi-metingan sa mga Apostoles nga bunuton alang sa pag puli sa nagdala sa papel ni Felipe. Wala nako damha nga ako moy makabunot ug makahulip sa iyang papel tungod kay sa akong kaugalingong panghuna-huna adtong panahuna dili pako andam. Gani ga ampo ko adto nga dili unta akoy makabunot, pero kay gihatag man sa Ginoo ang kahigayunan, naningkamot ko nga akong magampanan ang gimbuhaton sa usa ka Apostoles.

Tuod nahimo ko nga hingpit regular nga Apostoles apan ang pagsuway nag pabilin gihapon, ang akong anak nga si Grace na wala sa iyang insaktong panghuna-huna hangtod karon. Mao kini ang labing pait nga pagsulay nga akong natagamtaman karon sa akong pamilya. Taliwala sa daghang pag sulay sa akong kinabuhi, ako karon nag pabilin sa akong pagtoo kang Mons. Camilo C. Diel Sr. ALFA nga siya mao gayud ang ni balik nga Kristo nga mao ang ALFA.