PASIUNA
Ni adtong Hunyo 16,2017 adlaw nga Biyernes alas 8:00 sa gabii, didto mi sa Himaya, El Salvador City sa balay ni Apostol Narving Jaudian/DIDIHO usa ka kagawad sa syudad, Vice Chairman sa mga Apostoles ug Chairman sa 63rd and Mothers. Gisugdan namo sa Pag-ampo ug nangutana siya kanamo “unsa may inyong katuyoan?”. Amo siyang gitubag nga gusto mi masayud sa iyang kinabuhi ug didto iyang gisaysay kanamo kung unsa ang iyang kinabuhi sa pagkabatan-on, mga milagro ug ang kinabuhi sa iyang pagka Apostoles, labi na usab sa nakapalig-on sa iyang pagtoo, iya usab kining gisaysay ang iyang kasinati-an sa pagpakig-uban sa maestro ug natingala mi sa among nabati kay natubag man niya ang among pangutana sa huna-huna, halos magkapareha ang ilang tambag ni Chairman. Paghuman niya ug saysay iya kaming gipasulti mahitungod sa among nasinati sa paglakaw-lakaw. Adunay uban kanamo nakapatulo sa mga luha tungod sa nasinatian, apan siya miaghat kanamo nga among padayunon ang among gibuhat, kay kung giubanan kami ni ALFA mulampos mi. Miingon usab siya kanamo nga “Dawbi kung mo-undang mo, malipay kaha si ALFA?” ug kun gisugo mo ni ALFA kinsa may inyong pamati-on?” ug daghan pa iyang gisulti kanamo, mga tambag nga naka palig-on kanamo, nakahatag kini kanamo ug dugang kaikag sa pag-alagad sa Dios.
IKADUHANG PANAW KANG APOSTOL NARVING JAUDIAN/DIDIHO SA PAPEL NI APOSTOL SAN JUAN.
Unang Pangutana;
Pwede ba masayod mi sa imong kasinatian mahitungod kang Mons. Camilo C. Diel Sr. ALFA? Gikan sa imong pagka batan-on?
TUBAG:
Ang kinabuhi sa akong pagkabatan-on
1 Sa akong kinabuhi wala ko mahimong mahinimbahon sa Diyos. Sa akong pagka batan-on nag tubo ko nga usa ka tao nga dili gusto na naay daog-daogon, gali wala ko kahuman sa pag eskwela apan nitimbang ko sa akong ginikanan pag uma ug didto daghan mig abot gali aduna koy kaugalingong mga hayop. Ug sa dihang ang akong magulang nag menyo ang akong mga hayop maoy gigamit pag gasto sa kasal. Akong nahunahunaan nga kong diri ko mag tambay wala koy mahimo maong milarga ko sa marawi aron manarbaho ug nahimo kong breed winner sa among pamilya.
Ang Pag dawat sa Ikaduhang Ngalan
2 Sa dihang nasulod na sa akong hunahuna nga mag menyo tungod sa akong pagkatao wala ko angaye sa Uyo-an, Aya-an ug mga ig-agaw sa akong pangasaw-onon gali duna pay nag ingon unsay imong ibuhi sa imong pamilya? Sa akong pag ka menyo dunay mi-aghat kanako sa pagtambong sa seminar sa Simbahan sa IFI apan wala ko nanumbaling kay alang kanako ga langan-langan rana sa akong trabaho, apan miabot ang panahon nga adunay sakit nga midangat sa akong kinabuhi nga halos akong ikamatay ug dili ko makig adto sa doktor. Nataymingan na nakalaag si Arsenio Lumamba taga Gingoog anak ni Francisco Lumamba tighilot ni Mons.Camilo C. Diel Sr. ALFA ug gipakuha sa akong asawa aron iya kong tambalan ug sa diha na iya nakong gitambalan aduna siya’y gikuha nga gipahid niya sa akong agtang ug ilong ug nawala ko sa kalibutan kay nakatulog ko, pagmata nako nahuwasan nako. Sa dihang naulian ko nakadungog ko nga aduna napoy seminar ug naaghat ko nga mo tambong ug didto akong nasinati nga dili sayon ang pagpaminaw sa pulong sa DIYOS, naligo ko sa singot ug didto akong nasabtan nga ang tao dunay kalag nga nagkinahanglan ug ngalan nga maoy modawat sa kaluwasan nga si Mons.Camilo C. Diel Sr. ALFA ra ang makahatag. Sa adlaw sa inisasyon nakuhaan pagyud ang akong asawa abi nako ug dili ko makatambong apan ako siyang giingnan nga okey raba nga ako siyang biyaan kay muadto ko aron magpa-inisyal ko ug una aron sa sunod ra siya. Sa didto nako sa simbahan sumala sa akong nadunggan nga sa 200 mi kapin 80 ra ang inisyalan ug didto nakulbaan ko nga basin usa ko sa dili maapil. Sa pagpanawag na sa mga ngalan wala jud ko natawag ug naguol ko kay wala diay koy apil apan dunay usa ka magwawali nga miduol nako ug nangutana, “unsa diay imong ngalan? nganong wala ka matawag?” ug ako mitubag ”Narving Jaudian akong ngalan” didto dayon nasayran nga natampo diay sa babae ang akong ngalan kay Narcing iyang pagbasa human sa panghitabo nadawat na gayud nako akong ikaduhang ngalan.
Ang Pagkahimong Evanghelista
3 Sa akong pag-pangalagad adunay mi aghat kanako nga himoun kong evanghelista naaghat ko sa pagtuon ug didto miwali ko sa sugo ni Mons.Camilo C. Diel Sr. ALFA sa tibuok Misamis Oriental, Bukidnon, ug Camiguin kon MOBUCA. Bugti niini sa akong pagwali nakadawat ko ug mga pagtamay sa akong mga silingan miingon sila nga unsay akong ipakaon sa akong pamilya nga sige raman daw ko ug lakaw-lakaw apan wala nako sila panumbalinga ug nagpadayon ko sa misyon sa pagwali mahitungod sa mga pulong sa Diyos nga nahisulat sa Balaang Kasulatan.
Ang Pagkahimong Apostoles
4 Tuig 1985, nahimo kong apostoles sa Molugan Parish sa papel ni Apostol Juan sa akong kasinatian isip usa ka Apostoles didto matun-an nimo ang pagpailob sa ulan ug init ingon man sa akong mga kauban. Adunay panahon sa among panagtigom nga nagkabayloay mi ug mahait nga istorya nga misangko sa pagpanghanggat sa among Chairman nga si Nazer Laid/DIKAZO ug patig-away mikurog ko sakaulit ug nag ampo nga dili lang unta ko niya madapatan.
Estula
5 Tuig 1986, adunay gihimong bakwitanan sa mga tawo tungod sa kagubot didto sa Parokya sa Molugan luyo dapit sa Salupan, kalihukan sa mga ribelde ug nahadlok ang mga tawo. Si Mons.Camilo C. Diel Sr. ALFA miadto kuyog ni Monsignor.Telen ug Padre Butawan ug nakig estorya siya sa mga Apostoles nga mag-estula na dili na Bandana. Apan misupak si Monsignor. Telen nga "Ayaw Monsignor kay mga alaan sila ug Pari!" mao tong nihilom nalang si Mons.Camilo C. Diel Sr. ALFA ug nag padayon pagihapon nga bandana ang gigamit sa mga Apostoles.
Ang Panalangin sa Dios sa Akong Pag-misyon Isip usa Ka Apostoles
6 Sa akong pagka Apostoles nag sunod-sunod ang among lakaw ngani bisan sa panahon sa ting-pugas ako nalang gisalig sa akong manghud nga si Larry Jaudian ang pag-tudling sa akong umahan nga wala pay hinlo ug galing mitulo pa ang luha niini tungod sa kasagbuton. Ang ubang mga silingan mitamay pa nga nag ingon “naa bay abot ana nga sagbuton man ug dapanason pa gayud nga yuta?” sa akong pag balik gikan sa misyon ayha pa nako naatiman ang mga tanum. Sa panahon sa ting-ani sa mais wala ko magdahum nga mas daghan ang abot sa akong mais ug daghan ang mihangyo nga mutabang kay nakita nila ang kaabunda sa mais.
Ang Panalangin sa Pagka-himo nakong Politiko
7 Dunay panahon nga tulo ka kapitan nga nag-aghat kanako nga eLine-up ko pagka-kagawad ug nahibal-an ni Apostol Nazer Laid/DIKAZO ug iyang gisanghid ni Mons.Camilo C. Diel Sr. ALFA ug niingon siya "Maayo,maayo". Ug didto sa balay natingala ko na naay ni abot nga pamplates ug ngutana ko "Unsa mana?" nitubag ang nagdala gihatag ni Mons. Camilo C. Diel Sr. ALFA ug naka huna-huna ko kong mo dagan bako pagka-kagawad o dili. Last filling na pero wala ko ni adto kay naglugit ko sa lubi apan alas dose sa udto naay tingog akong nabati "FILE", ug didto ni uli ko sa balay na tingala akong asawa nganong niuli ko niingon ko nga "Mag File ko". Ug didto nag sugod nga nakadaog ko sa pagKagawad sa baranggay nahimong kapitan sa tulo ka termino ug sa karon kasamtangan kagawad sa syudad sa El Salvador City.
Ikaduhang Pangutana:
Unsa kahugot ang imong pagtoo nga si Mons. Camilo C. Diel Sr. ALFA maoy gisudlan sa Espiritu Santo nga mao ang ALFA ug ang Omega?
Tubag:
“Mga milagro nga ni-abot sa akong kinabuhi”
Ang pag Panganak sa akong Asawa
8 Para kanako wala nako’y duha-duha tungod sa akong nasinatian ilabina sa pag-panganak sa akong asawa nga naglisod sa pag-panganak niadtong higayuna naka tulog na siya sa kaluya ug nabalaka ang doktor ug giingnan ko nga e-sisaryan nalang mao tong mi hangyo ko nga pwede ba nga mosulod ko aron mo tan-aw ko sa kahimtang sa akong asawa, apan wala mosugot ang doktor mao tong sa akong kalagot wala gayud ako mag-papugong ug dala sa kabalaka ako siyang nawakli ug nakasulod gayud ko ug akong gikuha ang olio ug giabrehan ug akong gipahid sa parti sa iyang lawas ug paghuman akong gipandungan sa akong mga kamot pinaagi sa ngalan ni ALFA naka-anak akong asawa ug nahibulong ang doktor kay naka-anak na akong asawa.Ug human sa pag-panganak ni gawas ko sa kwarto sa hospital nangutana ang doktor unsa to nga perfume ang gigamit sa imong bana nga grabe kahumot nga naka pa anak sa imo ug nitubag ang akong asawa na "Olio ra man to dok".
Sa dihang gibunyagan ang bata didto sa Simbahan sa Buntod naa si Mons. Camilo C. Diel Sr. ALFA, ug pag-uli namo sa balay ni kuyog siya apan sa akong hunahuna maulaw ko tungod kay gubaon na among balay sa dihang niabot nami nangutana siya sa akoa “aha ang bata aha ang bata” nitubag ko nga naa sa taas ug misaka si Mons.Camilo C. Diel Sr. ALFA ug midungaw sa bata ug miingun “kong wala pa nagmisyon imong papa wala namo sa imong mama” didto na hunahunaan sa akong asawa nga kun unsa ka importante ang misyon sa Apostoles.
Milili ko sa Bangag sa kamatayon ug Napamatud-an ko na adunay Kalag ang Tawo
9 Ug sa ikaduhang bahin nga nakapalig-on nako kadtong nagsakit ko sa appendix nga halos milili ko sa bangag sa kamatayon. Sa panahon sa operasyon dugay ko nakatulog ug human sa operasyon sa alas 3 sa gabii, ug sa alas 7 sa gabii gidungawan nako akong lawas nga naghigda ug didto akong napamatud-an nga naa gayud diay kalag ang tao.
Ang tulo ka mga Lalaki
10 Sa didto nako sa among balay naghunahuna ko ngano nahitabo ni sa akong kinabuhi ug nangutana ko sa akong kaugalingon “unsay na kulang ngano nahitabo ni sa ako?” ug nakadisisyon ko nga magpapuli na sa pagka-apostoles. Apan sa dihang nakita nako nga adunay mga nagtindog sa akong atubangan nga tulo ka mga lalaki sa usa ka panagway nga dili pariha ang ilang gitas-on ang panagway mao si Mons.Camilo C. Diel Sr. ALFA . Adunay panahon nga nabughat ko ug sa pag-uli namo sa among balay sa akong pagka-tulog nakita nako nga nibisita si Mons.Camilo C. Diel Sr. ALFA daghan iyang kauban ug ako giignan akong asawa nga paghikay kay naatay bisita si Mons.Camilo C. Diel Sr. ALFA ug sa naka luto na iya kong giignan nga "Kaon-Kaon" ug nagkaon ko. Iyang gihubo iyang karsones ug iyang gitunol sa ako tungod sa kataha nga mabuling akong gidawat sa akong kamingking akong gisab-it sa lansang ug na wala si Mons.Camilo C. Diel Sr. ALFA ug nakamata ko. Sa akong pagmata akong gi saysay sa akong asawa ang tanan nga nahitabo sunod nga adlaw adunay nasab koy nakita na tulo ka lalaki ang duha kanila apostoles nga patay na si Apostol Mauro Fabrea/RUFERI nagdala sa papel ni Simon ug si Apostol Ernesto Rajal/NIROHO nagdala sa papel ni Felipe ang isa reserve nga Apostoles si Fernando Igloria. Ug nangutana ko sa ila kong nganong nagpakita sila sa ako ug ako silang nanganlan natingala akong asawa ngano akong nasampit ang mga ngalan sa mga patay na ako siyang giingnan nga ako jud sila nakita ug naestorya. Dinhi na usab akong hunahunaan ug midugang paglig-on ang akong pagtoo ug pagsalig nga si Mons.Camilo C. Diel Sr. ALFA nga mao ang gisudlan sa Dios Espiritu Santo nga mao ang ALFA OMEGA (PIN. 1;8).
Bagyo
11 Ang ikatulo nga nakapalig-on kanako, sa dihang gipadala ming mga Kagawad sa Syudad didto sa Cebu paingon sa Panglaw, sa among pag-uli dunay bagyo apan ang kapitan ni desisyon nga ipalarga gihapon ang barko. Sa dihang naa nami sa lawod among nahiagoman ang dakong unos tungod sa bagyo ug nangalisang ang mga tawo tungod sa dagkung balod nga halos motabon na ug mosaylo na sa luyo sa barko hangtud mitakilid na ang barko. Sa pikas tampi sa barko dadto nagkatapok ang mga tawo ug nag-inusara ko sa pikas tampi sa ngalan ni ALFA nga akong gisampit niadtong higayona mibalik sa pagplastar ug niplastar na pud ang dagan sa barko taliwala nga wala mihunong ang unos. Usa sa akong kauban mipasi-aw nga “grabi gitimbangan man ang pagtakilid sa barko!”.
TAMBAG:
“Ayaw ninyo ikalipay nga makaayo namo sa mga sakit, maoy ikalipay ninyo nga ang inyong ngalan nahisulat na sa basahon sa kinabuhi.”
“Ayaw mo pag-undang ug tuon, ayaw pagpadala sa mga dili maayong istorya gikan sa mga tawo nga wala makasabot sa inyong gitun-an.”
“Pailob lang kong gusto mo nga magamit ninyo ang gihatag sa mga Apostoles nga gibilin sa atong Maestro.”
“Batoni ninyo ang pagka maabi-abihon sa tanang tawo higugmaa ninyo ang inyong mga kaaway.”