PASIUNA

Ni adtong Julyo 1, alas 8 sa gabie didto me sa Tagbao-o Cogon El salvador City, sa panimalay ni Apostol Bebito Langala/BIGABU sa Papel ni Apostol Andress. Didto mi nag tapok sa simbahan sa Tagbao-o, ug didto uban kanamo ang iyang mga anak nga mihatag usab ug saysay kanamo. Didto gisugdan ni Apostol Bebito Langala/BIGABU ang iyang kasaysayan sa kinabuhi sa gamay pa siyang bata didto sa Bagucbuc Opol. Ingon man iyang gisaysay ang kapait ug kalisod nga iyang naagian, gisaysay usab niya ang daghang katingalahan o milagro sa iyang kinabuhi nga nahitabo sa ngalan ni ALFA sa makadaghan siya giluwas.

IKAPITONG PANAW DIDTO KANG APOSTOL BEBITO LANGALA SA PAPEL NI SAN ANDRES APOSTOL

Ang Kinabuhi sa akong Pagkabatan-on

1  July 3, 1950, ako natawo. Sa gamay pakong bata grabi kay ko ka badlungon maong ginganlan ko ug Leon sa akong mga ginikanan, tungod kay usa ka panahon niana sa dihang nagdigamo ko sa gamay pakong bata 12 anyos adtong higayuna ang akong manghud nag duladula sa akong tiilan nagkaraw ko ug lung-agan ako siyang gibadlong nga pahawa diha, dili man siya mutuo ako siyang gilaphawan, ug duna puy panahon nga naglung-ag gyapon ko unya ako siyang gisugo wala mo sugot, nagsinamok ang akong manghud ug akong gitugsok sa luwag ang iyang ngipon, naipo ug nasuko ang akong papa ug iya kong gilook pero akong gilubag ang iyang tudlo dayon nakong dagan, gigukod ko ug sanggot ug didto nidagan kog maayo nga dili ko masapon hangtud nakalukso ko sa mga pinutol nga mga kahoy mga ginganlag Digyangas, ug naglisod nakog gawas hangtud didto rako natulog sa gawas sa among balay, mao tong nakaingon ang akong mga ginikanan nga ako ang pinakabadlungon nga anak sa akong mga igsoon.

Sa Wala pako Matawag

2  Naminyo ko ug usa ka Pilipinista, didto mi nagpuyo sa Bagocboc, Opol Misamis Oriental ug nahimo kong Presidente sa among purok ug nagdala kog mga kalingawan, disco ug sa bulangan. Ug nakasulod kog usa ka kapunungan, sa pagtudlo nga dili ka madutlan ug daghan pa nga mga pagtoon mahitungod sa gahumgahum, akong gisulayan kay kini nga pagtulun-an patugo man, akong gitun-an ang pakusog ug makaibot nako ug bayabas nga pulso sa kamot ang kadak-on sa punoan ug ako siyang gisulayan ang pagguba ug akong gihuyop ang kandado nga gitay-an na ug na abli kini, ako pung gitun-an ang palupad ug makaambak nako ug lubi nga may 20 ft, ug akong gitun-an ang pagcontrol sa tawo pinaagi sa hibihibi nga sagbot akong gisulayan pinaagi sa akong kamot, ako siyang tandugon bisan layo ra ug kini natandog, mga 15 meters apan dismayado ko kay gusto nako kutob sa maabot sa akong mata akong macontrol, mao tong niundang ko kay nakita nako nga dili ko kuntento sa maong gahum.

Ang akong Pagdawat sa akong Ikaduhang Ngalan

3  Usa ka panahon, nahimo kong usa ka Presidente sa among kapilya sa Bagocboc ug nakahunahuna ko nga kon pangutan-on ko sa uban Relihiyon wala koy ikatubag kay wala man koy hanaw kay dili man ko hinimbahon mao tong nangandoy kog lecture bahin sa 24 ka tema ug niabot ang panahon nga naay lecture sa 24 ka tema, ug niadto ko kay gusto ko maminaw apan wala madayon kay ako raman isa, apan wala ko nawad-i sa paglaum pagkaugma nibalik ko ug duha nami kabuok, napugos silag lecture kay duha naman mi kabuok ug didto akong nabati ug nasinati nga dili sayon maminaw sa pulong sa Diyos, sa panahon nga naminaw ko sa wali adunay mutabon sa akong agtang nga itom, kung mulitok ko ug tabangi ko Jesus Nazareno mulagpot ang maong itom ug didto ko nakaingon nga kini nga pagtulun-an iya sa Diyos ug ako kining gisudlan ug nakahuman gyud ko sa pagpaminaw sa lecture. Niabot ang Initiation ug niapil mi, ug didto sa circle gipandungan ko ni Mons. Camilo C. Diel Sr. ALFA. Ug sa akong pag uli, daghan kog nangakita nga dili makita sa ubang tawo, dili ko makatulog kay sige silag pakita nako, ako sang makita si Mons. Camilo C. Diel Sr. ALFA ug ang Cathedral sa Cagayan nga naay hagdanan nakonekta gikan sa langit nga nagsaka kanaug ang mga Balaan ug Manulonda. Apan ang akong dili ma agwanta ang makita nako nga ang dautang espirito nga mudasmag kanako sa panahon sa katulogon ug sa panahon nga mudulog ko sa akong asawa dili ko makahimo kay naay sigeg dungaw namo, nag ampo ko ni Mons. Camilo C. Diel Sr. ALFA nga ipakuha kay ug dili makuha dili nako makaya ug sa dihang nagsimba ko iyang gihawiran ang akong agtang ug kini mipiti ug iyang gikab-ot ang usa sa akong ig-agaw nga taga Bagocboc nga si Aquillo Laid, ug didto sa akong pag uli wala nakoy makita. Ug didto gipulihan ang akong simbolo, ug si Primo Eduria nangutana nako nga “Apostoles ka?” ingon ko nga dili ug niingon siya “malibog ang mga tawo ani kay dili Apostoles ang gisudlan ug Apostoles” ug dunay panahon nga nangutana si Mons. Camilo C. Diel Sr. ALFA? “pila mo kabuok Apostoles” ako mitubag “mangutana sa ko ni Apostol Narving kay di man ko Apostoles ALFA” ug kaduha ko niya gipangutana niini nga pangutana, ug sa sunod ako ng gipangandaman nga kung mangutana siya ako siyang ignon nga “ikaw na ang nasayod sa tanan” pero wala na siya nangutana, apan sa pagligid sa panahon, nahimo gyud kong isa ka Apostoles sa Opol.

Si ALFA Nanalipod sa ako sa mga Dautang mga Tawo

4  Adunay isa ka panghitabo sa akong kinabuhi nga dili nako malimtan tungod kay didto nako nabatian nga giubanan ko sa Diyos nga akong gituohan karon, usa ka adlaw niana nidagsa ang mga daghang rebelde sa among lugar sa Bagocboc, gasakasaka silag mga kabalayan, mangayo ug hinabang, pagkaon ug uban pa ug usa niana ang among balay. Apan sa sunod nilang balik wala na nako sila pasak-a ug didto nagsugod silag kasuko nako, nganong dili ko magpasaka, ako silang gitubag nga “naglisod gani ko ug buhi sa akong pamilya, kamo na hinuon nga daghan kaayo mo” mao tong giinitan ko nila ug gitinguha nila akong kinabuhi. Usa ka adlaw ila kong giatangan ug akong nabatian ang pag pitipiti sa armas sa laktod nga istorya wala mubuto ang ilang armas. Ug aduna puy panahon, nagbaklay ko naay nihunghung sa akong hunahuna nga adunay nag-atang sa ako sa unahan ug didto nihangad ko sa langit ug nag ampo ug sa kalit mingisdong ang langit ug mibusdak ang kusog nga ulan, ug miingon na usab ang nihunghung nga lakaw na kay misilong sila ug sa akong paglakaw nakita nako ang mga inagian sa ilang mga tunob nga nanglakra sa dalan nga naa sa kilid sa sapa. Miadto ko sailang Mons. Camilo C. Diel Sr. ALFA, nangunsulta ko kung unsay akong buhaton, ingon siya “lugsong, kay nagtinguha sila sa imong kinabuhi” ingon ko nga” “unsaon man nako pag buhi sa akong pamilya nga gamay ra ang yuta nga kabilin sa akong ginikanan” ug mitubag si Mons Camilo C. Diel Sr. ALFA “akoy bahala nimo, akoy bahala nimo, lugsong lang” ug mituo ko saiya, kay misalig man ko saiya, ug sa akong paglugsong didto akong nasinati ang kaaway nga pamahaw, paniudto ug panihapon, mao tong magtungasan japon ko sa bukid, gitugon ko ni Mons. Camilo C. Diel Sr. ALFA nga tulo rako ka adlaw didto, ug wala ko kasabot unsang adlawa tong tulo. Adunay panahon nakatungas ko ug nag ipo ug naglubo ug mais niabot ko ug huwebes didto kay wala mahuman ang akong trabahuon sa paglubo ug sa gabii niana adunay mga tawo kamulo kong lubo ila kong gilibutan ug giistoryahan kung nganong dili ko magpasaka, tungod sa pulong nga akong nadawat gikan ni Mons. Camilo C. Diel Sr. ALFA ug tungod sa akong pagtuo niya nga mao ang ALFA. Natingala ko nga wala ko mibati ug kahadlok nga para kanako ang Diyos ra ang akong gikahadlukan adtong higayuna ug wala gayud sila mulampos sa ilang tinguha kanako ug akong nasabot nga tulo ra gyud diay ko ka adlaw nga safety didto niadtong panahona Martes, Myerkules ug Huwebes.

Ang Kinabuhi sa akong Kawalad-on

5  Sa dinhi nami nagpuyo sa Cogon, nasinati nako ang tumang kapait dili nami makakaon sa insaktong kan-anan, ang among pamahaw saging ang among paniudto saging ug usahay ipalabon nalang namo sa among mga bata ang among pagkaon, usa sa akong mga anak musinggit “ Pa, luto” mutulo ang akong mga luha, apil ang akong asawa apan bisan pa niana panahon nga makakwarta mi maggahin gayud mi ug para halad or pamiliti ug tungod sa kapit-os usahay amo lang baklayon padulong simbahan dala ang mga bata. Miabot pa gayud ang panahon adunay dakong pagsulay nga mihuyop sa akong kinabuhi sa dihang usa sa akong anak ang nawala, apan wala gihapon mi nawad-an sa among pagtuo. Miligid ang panahon, sa kataas sa among pagserbisyo wala namo damha ang miabot nga mga panalangin, kay sakto na ang among pagkaon, ug ang among gikalipay sa akong asawa kay ang upat nako ka mga anak nahimong sama kanako nga Apostoles.

Ang Pagkahimo nako nga Apostoles

6  Sa wala pako nahimong usa ka Apostoles, nag uban uban kog misyon sa mga Apostoles diri sa Molugan, ug didto sa Opol ang usa sailang mga Apostoles nga si Tiopilo, nga nagdala sa papel ni Andres, gipulihan kay nangabit ug nangita sila ug puli ug si Chairman Premitivo Juliada, nagpresent ni Mons. Camilo C. Diel Sr. ALFA ug lima ka mga pangalan nga maoy pilian aron himuon ug puli, apan mibalibad si Mons. Camilo C. Diel Sr. ALFA ug miingon nga naay iyang ipuli kanang kabalo muwali kabalo muleturhiya. Pagkagabii nagdamgo si Chairman nga nakita ko niya nga full pack ug didto sa pagmata niya iya kung gipangita ug gitugon ang akong asawa ug giignan nga musugot ba ko pagka Apostoles ug wala ko mibalibad ug nagkahiduol na ang kasaulogan sa Holy Week nagkatigum ang mga Apostoles sa Opol ug niapil ko sa tigum tinambungan ni Mons. Camilo C. Diel Sr. ALFA, ug nangutana siya kung kinsay nakapuli ni Pilo Tawakal, ug sila miingon “si Bebito Langala Mons” ug si Mons.Camilo C. Diel Sr.ALFA nag ingon “Very good maayo ni kay….”

Ang Pagmarka sa 63rd and Mothers didto sa Kapilya sa Himaya

7  Tuig 1987, adunay panahon nga nagpahina mi sa Himaya ug gisugo ko ni Mons. Camilo C. Diel Sr. ALFA nga markahan ug 63rd and Mothers ang maong simbahan, kay muabot ang panahon dili nami makasulod sa IFI nga simbahan, ug wala damha sa pagligid sa panahon gisipa sa Obispo sa IFI ang mga Apostoles sa Molugan bisan ug Apostoles ko sa Opol miuban ko sa ila tungod kay para kanako dili ko mahimong IFI kung dili tungod sa 63rd ug karon sa kasalukuyan akong gibarugan ang 63rd and Mothers Apostolic Church nga maoy tinuod nga katawhan sa Diyos nga si Mons. Camilo C. Diel Sr. nga mao ang ALFA ug ang OMEGA.

Ang akong Nasaksihan

8  Sa bag-o pako na Initialan, akong nakita sa panahon sa pagsimba basta naa si Mons. Camilo C. Diel Sr. ALFA mura siya’g maglangoy sa mga tawo tungod sa kadaghan niini, dili na gani halos matagakan ug dagom, ug tungod kay bag-o pako ang mga tawo busy na kaayo ug amin, akong hunahuna nga dili ko muamin kay basin mailugan ko sa akong bangko kay daghang tawo lisod ang pagduol, pagsugod sa misa natingala ko kay pagtan-aw nako sa iyang mata kay adunay siga nga grabi kasulaw nga dili matutukan ug gitago ko sa bangko apan milusot ang siga niini ug didto akong nahunahunaan nga nasuko siya sa ako nga wala ko muamin kaniya, tungod sa bangko na mahadlok ko nga mapulihan, ug didto nangayo kog pasaylo ug misaad ko nga muamin nagyud ko ug sa akong pagtan-aw mibalik pagkalumo ang iyang mga mata. Sa pag uli namo sa balay, akong gisubayan ang akong asawa ug misubay pud siya saiyaha nga pareha ra diay ang nahitabo kanamo, sa laktod nga istorya kaming duha nakasaksi nga dili ordinaryong tawo si Mons. Camilo C. Diel Sr. ALFA ug didto among naila nga siya gayud si ALFA.

Ang mga Milagro na akong Nasaksihan

Giluwas mi gikan sa Kakuyaw

9  Marso 1989, adunay panghitabo nga dili nako malimtan, usa ka adlaw niana nagsakay kami sa jeep de pasahero kauban nako ang akong asawa, ug duha ka anak si Yanyan upat ka tuig ug si Kikim upat ka bulan nga gisabak sa akong asawa nga naglingkod sa extension nga bangko ug ako nagkabit sa gawas. Ug unya sa kalit may mipaka ug mihaguros pagdagan ang sakyanan nga nihinayhinay’g libay sa kalsada tungod sa crossing sa San Miguel Luyong Bonbon, Opol. Ug miconcentrate ko nga ipabangga ang sakyanan sa kahoy duol sa Mercado sa Luyong Bonbon aron dili mi ma hulog sa tulay ug unya nabangga gyud sa kahoy ang sakyanan duha ka tawo ang nagligidligid, ug ang isa ka tao nalabay sa kalsada ug adunay nakabunal ang ulo ug mikirig, samtang ang jeep hinayhinay nga nitumba. Milukso ko ug dayon ni tan-aw ko sa sulod sa jeep, nakita ko ang akong asawa nga naglingkod gihapon nga nagkugos sa bata, samtang ang tanang pasahero nangatumba. Gialsa nako ang babaye ug lalake nga wala nay panimoot kay gipangita ko si Yanyan, sa pag alsa nako sa samaran nga lalake nikalit pagtindog si Yanyan nga wala maunsa ug miingon “Ma”, halos tanan pasahero ug ang driver samaran ug nadala sa Ospital. Sa laktod, sa ngalan ni Mons. Camilo C. Diel Sr. ALFA naluwas ang akong pamilya nga sakay niadtong jeep.

Miadto kami sa ilang Mons. Camilo C. Diel Sr. ALFA, sa kapelya gipahulat mi ni Larry Jaudian kay iya pang sultihan si Mons. Camilo C. Diel Sr. ALFA sa nahitabo sa kalit nigawas si Mons. Camilo C. Diel Sr. ALFA nga murag naglutaw paingon kanamo ug miingon “ unsa-unsa man?” ug among gisaysayan sa nahitabo unya gipandungan ming upat ako sa akong asawa ug sa akong duha ka anak human sa pagpandong gikaptan niya ang among dughan ug dihadiha nawala ang kulba or nerbyos sa akong asawa, salamat sa Diyos nga si Mons. Camilo C. Diel Sr. ALFA nga walay dautan nga nahitabo kanamo, ug mipauli mi sa balay nga malipayon.

Ang Pagwali sa Lugar sa Camiguin

10  Gipadala mi ni Mons. Camilo C. Diel Sr. ALFA sa Camiguin ug duna siya gipadala nga kwarta og miingun siya nga “pliti ni, pliti ni”, apan sa didto nami sa Camiguin kusog kaayo ko manigarilyo ug nahurot ang kwarta nga gihatag ni Mons. Camilo C. Diel Sr. ALFA. Natingala ko kay nikalit ug init ang akong lawas ug sa dihang molecture nako sa tema dili nako makalitok tungod sa kakurog sa akong mga ngabil ug didto nag ampo ko saiya nga papaulia lang ko, ayaw lang ko himoa ug pabigat sa akong mga kauban halos ikamatay na nako ang akong gibati. Sa akong pag uli nag misyon gihapon ko, uban sa mga Apostoles ug sa tinghalok sa Dignum, nag ampo ko nga mamatay ang akong balatian uban sa iyang kamatayon, ug sa iyang pagka banhaw, mibanhaw ang akong paglaum ug naayo ko human sa pagkabanhaw.

Ang Pagwali didto sa Barangay San. Francisco

11  Adunay panahon nga nag wali ko sa Dalayap nga ako ra isa ang nag lecture, ug pagkagabii niana halos ko mokawan sa akong higdaanan ug didto nag ampo ko ug miingun ko nga ALFA padal-i kog kauban diri kay kung dili ko nimo padal an bisan isa kabook dili ko mo padayon paglecture ani, ug akong ginganlan ang duha ka simbolo nga gusto nako nga moapas nako ug pagkaugma niabot ang isa sa buntag nga si Aquillo Laid, ug akong gipangutana “maayo kay naka abot naka?” ug siya mitubag “sa akong damgo naa koy nakita nga duha ka hilikopter nga diri paingun ug akong gisundan ug ako kang nakita nga nagkutaw sa itlog nga naglutaw sa tubig sa drum” ug pagkahapon ang isa niabot na usab si Efepanio Macatual.

Ang Pagkawala sa akong PIN

12  Sa pagpahina namo nawala ang akong PIN didto gihapon dapita sa among ge lecturan og nagool ko ug akong gikonsulta kang Mons. Camilo C. Diel Sr. ALFA kung asa na akong PIN ug daghan siya’y gipakita nako nga PIN og miingun si Mons. Camilo C. Diel Sr. ALFA nga “mao ni, mao ni?” ug ako miingun nga “dili Mons.” ug si Mons. Camilo C. Diel Sr. ALFA miingun “ayaw nagtoo nako kung dili na nimo makit an” ug nilabay ang pulo ka tuig ako gayud nakit an.

TAMBAG:

- Magbantay sa temptasyon kay maoy makapukan sa inyo.

- Ayaw pagdali kay basig karon paspas pa kaayo mo pero di mo mulahutay.

Yukbo:

Nganha sa iglesia sa Dios nga anaa sa Amahan ug kang Jesukristo nga si ALFA, ang grasya ug kalinaw maanaa kaninyo tungod sa inyong pagtoo taliwala sa tanang paglutos ug kasakitan nga inyong gisagubang karon.